Ritstjórn

May 30, 2024May 31, 2024

Íslenskt lækningatæki veldur byltingu í munnhirðu sjúklinga

Síðasti fræðslufundur SFH og Kvenn á þessum vetri var haldinn í Mannréttindahúsinu þ. 29. maí 2024. Þar fengum við mjög fróðlegan og gagnlegan fyrirlestur frá Dr. Þorbjörgu Jensdóttur um lækningatækið HAp+, virkni þess og hvaða hugmyndir lágu þar að baki. Einnig fjallaði hún um stofnun fyrirtækja, samskipti við vísinda- og tæknimenn og fjárfesta svo og um markaðssetningu. Fyrirlesturinn var afar gagnlegur og fróðlegum og þökkum við Dr. Þorbjörgu kærlega fyrir.

Dr. Þorbjörg Jensdóttir stofnandi og framkvæmdastjóri IceMedico lauk doktorsnámi í Danmörku og stundaði rannsóknir þeim tengdum á glerungseyðingu tanna. Þær rannsóknir leiddu af sér þróun HAp^+,munnsogs-molanna sem örva munnvatnsframleiðslu án þess að eyða glerungi tannanna og sem bæta lífsgæði fólks sem þjáist af munnþurrki. Styrkur HAp+ er fyrst og fremst sá að langvarandi notkun molanna skemmir ekki tennur.
Þorbjörg stofnaði fyrirtækið IceMedico til markaðssetningar, sölu og frekari hönnunar. Mjög stór markaður er fyrir vöru eins og HAp+ því um 400 lyf á Íslandi valda munnþurrki og margir sjúkdómar svo sem Sjögrens heilkenni skerða starfsmi munnvatnskitla og hefur samstarf með fagfólki úr læknavísindunum reynst mjög haldgott til að byggja upp góða lækningavöru og sterkt vörumerki, enda er varan upprunnin úr læknavísindum.

Dr. Þorbjörg segir HAp+ vera nýsköpun sem teljist til næstu kynslóðar af sælgæti, enda brúi þeir bilið á milli matvælaiðnaðar og tannlæknisfræðinnar. „HAp+ molarnir voru upprunalega þróaðir fyrir fólk sem þjást af munnþurrki,” segir dr. Þorbjörg. „Molarnir örva munnvatnsframleiðslu tuttugufalt og eru þrisvar sinnum virkari en að tyggja tyggigúmmí. Molarnir voru upphaflega þróaðir sem lausn við munnþurrksvandamáli en eru nú að ryðja sér til rúms sem lífstílsvara, enda sykurlausir, kalkbættir, hitaeiningasnauðir og tannvænir.“

HAp⁺ tæknin er afrakstur 15 ára klínískra rannsókna og vöruþróunar í Danmörku og á Íslandi á sviði tannlækninga. Tennur eyðast þegar þær verða fyrir sýruárásum. Munnvatn, sem er örvað af sýru, styrkir tennurnar og heldur þeim heilbrigðum. Þessi þversögn er leyst með einstöku sýru/kalsíum hlutfalli HAp⁺, sem sýrir munnvatnið án þess að gera það tærandi fyrir tennurnar. Þetta skapar áhrifaríkt munnvatnsörvandi efni sem, vegna mikils magns kalsíums, veldur ekki tannskemmdum. HAp⁺ er þannig byggt á einstöku sýru:kalsíum (Ca) hlutfalli; þannig að hýdroxýapatit (Ca₁₀(PO₄)6(OH)₂) steinefnið, þekkt sem HAp, er yfirmettað og kemur þannig í veg fyrir eyðingu á glerungi tannanna. Þannig virkar HAp+ sem mjög hæfur og áhrifaríkt munnhreinsiefni, sem er t.d. þrisvar sinnum áhrifaríkari en tyggigúmmí. Tannlæknafélag Íslands mælir með HAp+, varan sem flokkast sem lækningatæki er klínískt prófuð og er varið með alþjóðlegum einkaleyfum.

Þorbjörg var valin frumkvöðull ársins 2016 af Stjórnvísi 2016 og fékk GlobalWin viðurkenningu fyrir hugmynd síðan í Bari á Ítalíu árið 2017.

Hlekkir:
IceMedico
Stjórnvísi
GlobalWin

February 10, 2024May 31, 2024

Heimsókn frá SideWind

Græn orka í skipaflotanum: Íslenskir frumkvöðlar í fararbroddi

Þann 8. febrúar fengum við frábæra heimsókn frá fyrirtækinu SideWind, hjónin og frumkvöðlanna þau Maríu Kristínu Þrastardóttur og Óskar Svavarsson. Markmið fyrirtækisins er að sýna fram á möguleika vindorku í að minnka kolefnislosun vöru- og gámaflutningaiðnaðarins. SideWind kemur fram með nýja hugmynd sem byggir á plug&play tækni, endurvinnanlegri, hagnýtri og afar hagkvæmri vindtúrbínu á lóðréttum ási (VAWT), sem komið er fyrir í endurnýttum, færanlegum, vegglausum flutningagámum sem virkjar þá vindorku sem flæðir yfir flutningaskip bæði á ferð og við akkeri.

Það verður mjög spennandi að fylgjast með verkefninu SideWind í framtíðinni.

Sjón er sögu ríkari: Heimasíða SideWind.is

January 21, 2024January 21, 2024

Heimsókn frá Auðnu Tæknitorgi

fyrirlestur Einars Mäntylä

Fyrsti félagsfundur ársins SFH og Kvenn var haldinn í húsnæði félagsins að Sigtúni 42 í Reykjavík þ. 18. janúar 2024. Á fundinum hélt Einar Mäntylä framkvæmdastjóri Auðnu Tæknitorgs kynningu á starfsemi Auðnu. Einar Hann er með doktorsgráðu í sameindaerfðafræði og MBA in Innovation and Business Creation frá Tækniháskólanum í Munchen (TUM) og áratuga alþjóðlega reynslu af lífvísindum, líftækni og þróun líftæknilyfja. Hann hefur unnið sem frumkvöðull og stjórnandi að tækni- viðskipta- og vöruþróun og hefur unnið að stefnumótun á sviði nýsköpunar innan félagasamtaka, fyrirtækja og háskóla.

Einar hefur kennt ýmsar greinar líftækni við innlenda og erlenda háskóla og ver gesta-dósent við Lyfjafræðideild Háskóla Íslands. Hann er meðlimur í alþjóðlegri dómnefnd Eureka Eurostars nýsköpunar áætlunarinnar. Einar err frumkvöðull og meðstofnandi ORF Líftækni hf. Og DISACT efh. „Vísindin eru lykillinn að betra, upplýstara og samkeppnishæfara samfélagi.“

Það var mikill fengur í því að fá Einar á fund með okkur. Hann kynnti okkur starfsemi Auðnu Tæknitorgs en fór einnig vítt og breytt yfir ýmis hafkvæm atriði sem geta nýst frumkvöðlum svo sem umsóknir um einkaleyfi o.fl.

Auðna Tæknitorg (https://audna.is/) sinnir tækni- og þekkingaryfirfærslu fyrir alla háskóla landsins og helstu opinberu rannsóknarstofnanir. Auðna er óhagnaðardrifið fyrirtæki sem er í eigu allra háskóla landsins, Landspítala Háskólasjúkrahúss, Vísindagarða Háskóla Íslands, Matís og Samtaka Iðnaðarins. Markmiðið er að styðja íslenskt vísindasamfélag með ráðum og dáð þegar kemur að hugverkavernd, greiningu á markaðs- og hugverkalandslagi, tengja uppfinningar og væntanleg nýsköpunarverkefni við fjárfesta og atvinnulíf, einnig aðstoð við myndun sprotafyrirtækja.

Auðna er opin öllum frumkvöðlum sem geta þar fengið ráðgjöf og leiðbeiningar varðandi stofnun sprotafyrirtækja og hugverkarétt.

Við hvetjum alla félagsmenn til að kynna sér starfsemi Auðnu á https://audna.is/ eða https://ttoiceland.is/ og vera óhræddir við að hafa samband við þeirra ráðgjafa.

Sérstök athygli skal vakin á Masterclass námskeiði Auðnu sem verður haldið fljótlega

November 2, 2022November 2, 2022

Fréttir frá Hugverkastofu

Alþjóðleg lyfjafyrirtæki eiga flest skráð einkaleyfi og vörumerki hér á landi

Marel, Össur og Hampiðjan með flest íslensk einkaleyfi innlendra aðila

Alþjóðleg lyfjafyrirtæki skipa öll efstu fimmtán sætin á lista yfir þau fyrirtæki sem eiga flest einkaleyfi hér á landi. Níu af þeim fimmtán fyrirtækjum sem eiga flest skráð vörumerki eru einnig alþjóðleg lyfjafyrirtæki. Þau fyrirtæki sem eiga flestar hönnunarskráningar eru fjölbreyttari en meðal þeirra eru erlendir bíla- og úraframleiðendur áberandi. Þessar upplýsingar og margt fleira má finna í nýútgefinni gagnvirkri tölfræði á vef Hugverkastofunnar.

Alls eru skráð tæplega 9.500 einkaleyfi á Íslandi og ríflega 60.000 vörumerki. Hönnunarskráningar eru ríflega 1.400.

Á síðunni er m.a. hægt að nálgast upplýsingar um umsækjendur og eigendur hugverkaréttinda hér á landi, eftir löndum. Ef aðeins er horft til íslenskra aðila eru í gildi 89 einkaleyfi hér á landi, tæplega 7.000 skráð vörumerki og 129 hönnunarskráningar. Marel á flest einkaleyfi, ellefu talsins og Össur og Hampiðjan næstflest, 10 hvort fyrirtæki. Actavis á flest skrásett vörumerki eða 479, Ölgerðin Egill Skallagrímsson á 122 og Mjólkursamsalan 93. Flestar hönnunarskráningar eru í eigu einstaklinga.

Þegar horft er til þess hvaðan þau fyrirtæki eru sem eiga flest hugverkaréttindi hér á landi verma bandarísk fyrirtæki toppsætið bæði hvað varðar einkaleyfi og vörumerki. Þýsk fyrirtæki fylgja þeim fast á eftir varðandi hvort tveggja. Flest fyrirtæki sem eiga skráða hönnun eru svissnesk, þá koma íslensk fyrirtæki og bandarísk fyrirtæki eru þar í þriðja sæti.

Hægt er að sækja um skráningu hugverkaréttinda á vef Hugverkastofunnar.

Um Hugverkastofuna

Hlutverk Hugverkastofunnar er að fara með málefni varðandi einkaleyfi, vörumerki, hönnunarvernd, byggðarmerki og önnur hliðstæð réttindi sem kveðið er á um í lögum, reglugerðum og alþjóðasamningum um vernd eignarréttinda á sviði iðnaðar. Stofnunin veitir einstaklingum, stofnunum og fyrirtækjum upplýsingar og ráðgjöf varðandi hugverkaréttindi í iðnaði og vinnur að því að ný tækni og þekking sem felst í skráðum hugverkaréttindum verði aðgengileg almenningi. Hugverkastofan heyrir undir nýtt ráðuneyti háskóla, nýsköpunar og iðnaðar.

September 22, 2022September 22, 2022

Heimsókn SFH í Hugverkastofuna

22. september 2022

Fyrsta fræðslu- og fyrirtækjaheimsókn haustsins var í Hugverkastofuna sem er opinber stofnun undir yfirstjórn háskóla-, iðnaðar- og nýsköpunarráðherra. Stofnunin tók til starfa þ. 1. júlí 1991 undir heitinu „Einkaleyfastofan“ og tók þá við hlutverki einkaleyfa- og vörumerkjadeildar iðnaðarráðuneytisins. Þann 1. júlí 2019 var nafni stofnunarinnar breytt og ber stofnunin nú heitið Hugverkastofan.

Á fundinum fengum við frábæra og mjög gagnlega kynningu á starfsemi stofnunarinnar sem var í höndum Margrétar Ragnarsdóttur lögfræðings hugverkasviðs. Henni til halds og trausts var Eiríkur Sigurðsson samskiptastjóri.

Á fundinum fengum við ítarlega og skemmtilega kynningu á starfsemi Hugverkastofu og hinna ýmsu sviða þar á bæ og var fjallað um hugverk og hugverkaréttindi og lagalegan grundvöll stofnunarinnar og umsóknarferli þegar við sækjum um hönnunarvernd, vörumerki og einkaleyfi. Einnig var rætt um viðskiptaleyndarmál og höfundarrétt o.fl. spennandi málefni.

Rétt er að benda á heimasíðu Hugverkastofnunar www.hugverk.is en þar er að finna ýmsar hagnýtar upplýsingar fyrir hugvitsmenn og frumkvöðla. Þar er einnig að finna leitarvél fyrir vörumerki, einkaleyfi og hönnun á Íslandi https://www.hugverk.is/leit/einkaleyfi.

Einnig skal bent á þá viðamiklu ráðgjöf sem öllum hugvitsmönnum og frumkvöðlum stendur til boða hjá stofnuninni.

Við þökkum kærlega fyrir frábærar móttökur og skemmtilega og fróðlega fræðslu um hugverk og hugverkavernd sem kemur okkur öllum til góða.

Sjáumst öll í næstu fræðslu- og fyrirtækjaferð!

August 26, 2022August 29, 2022

Fimm Íslendingar hlutu tilnefningar

Fimm Íslendingar voru tilnefndir og hlutu viðurkenningu á vegum GlobalWiin

Fimm Íslendingar voru tilnefndir og hlutu viðurkenningu á vegum GlobalWiin, sem veitir verðlaun fyrir bestu uppfinninguna, eða frumkvöðlaverkefnið, ár hvert. Tvisvar hefur íslensk kona unnið aðalverðlaunin, en þeim fylgir titillinn: „uppfinningakona ársins.“

Þau sem voru tilnefnd að þessu sinni voru þau María Guðmundsdóttir, fyrir tölvuleikinn Parity, Ragnhildur Ágústsdóttir og Júlíus Ingi Jónsson fyrir The Lava Show og loks Guðrún Líf Björnsdóttir og Guðmundur R. Einarsson fyrir Skapalón.

Ragnhildur og Júlíus ásamt Elinóru Ingu Sigurðardóttur

Verðlaunin ganga út á að gera konur meira sýnilegar í nýsköpun og hvetja þær áfram. Er þetta í fyrsta skipti sem teymi fá viðurkenningu. Því gátu Guðmundur og Júlíus verið meðal tilnefndra, þótt þeir séu ekki konur.

Verðlaunahátíðin hefur ekki farið fram í tvö ár vegna heimsfaraldursins Covid-19, svo viðurkenningar voru veittar þeim sem tilnefndir hafa verið síðastliðin 2 ár.

Guðmundur og Eyþór voru einu Íslendingarnir sem sáu sér fært að vera viðstaddir athöfnina í Lundúnum, en Elínóra Inga Sigurðardóttir, fulltrúi Íslands í framkvæmdastjórn GlobalWiin, úthlutaði viðurkenningunum til hinna í kjölfarið.

Eyþór tók á móti verðlaunum sem “karlkyns meistari”.

Þá hlaut Dr. Eyþór Ivar Jónsson viðurkenninguna „Karlkyns meistari“ (e. Male champion), fyrir störf sín í tengslum við frumkvöðlastarf og hvatningu til kvenna í gegnum árin, en hann er einn af stofnendum Akedemias.

Haldið á Íslandi að ári

Undirbúningur er þegar hafinn fyrir næstu GlobalWiin verðlaunahátíð, sem mun fara fram á Íslandi í september að ári.

Fljótlega verður hafist handa við að tilnefna konur til viðurkenningar fyrir nýsköpun. Alþjóðleg dómnefnd fer svo yfir tilnefningarnar og tekur viðtöl við þær sem komast í úrslit.

August 16, 2022August 17, 2022

Opið fyrir umsóknir í Fræ/Þróunarfræ

Umsóknarfrestur til 26. ágúst 2022

Fræ og Þróunarfræ hafa það að markmiði að styðja við hugmyndir og verkefni á frumstigi sem geta leitt af sér stærri þróunarverkefni. Umsóknir sem berast fyrir 26. ágúst nk. verða teknar fyrir af fagráði sjóðsins í næstu lotu.

Alltaf er opið fyrir umsóknir en umsóknir sem berast fyrir 26. ágúst nk. verða teknar fyrir af fagráði sjóðsins í næstu lotu. Tilkynnt verður um úthlutun í júní 2022.

Fræ er undirbúningsstyrkur til ungra frumkvöðlafyrirtækja eða einstaklinga og er sniðinn að verkefnum á hugmyndastigi eða á frumstigi í þróun afurðar

Þróunarfræ er forkönnunarstyrkur til ungra frumkvöðlafyrirtækja og einstaklinga til að ráðast í þróunarsamvinnuverkefni. Hugmyndin að verkefninu þarf að fela í sér að leitað er nýrra lausna eða tækni til að leysa áskoranir og bæta lífskjör fólks í þróunarlöndum.

Styrkupphæð getur numið allt að tveimur milljónum króna og verkefninu skal lokið innan 12 mánaða

Allar nánari upplýsingar um Fræ/Þróunarfræ eru að finna á síðu sjóðsins.

RÚV 16. ágúst 2022

Fréttir að Norðan

Á Akureyri er í boði vinnuaðstaða fyrir frumkvöðla með nýsköpunar- og frumkvöðlaverkefni á byrjunarstigi og hún talin góð lyftistöng til að þróa áfram hinar ýmsu hugmyndir.

Styrkir frumkvöðla og AkureyrarAkademíuna

Vinnuaðstaðan er á vegum AkureyrarAkademíunnar í samstarfi við Akureyrarbæ. „Markmiðið er tvennskonar. Í fyrsta lagi er þetta hugsað sem stuðningur við frumkvöðlana og hins vegar stuðningur við starfsemi AkureyrarAkademíunnar,“ segir Aðalheiður Steingrímsdóttir, framkvæmdastjóri AkureyrarAkademíunnar.

Viðskiptalausnir á netinu algengasta viðfangsefnið

Verkefninu hefur verið haldið úti frá því í maí í fyrra og hefur reynst vel. „Þeir sem hafa hingað til verið hjá okkur hafa aðallega verið að vinna að því að þróa ýmsar viðskiptalausnir á netinu fyrir stofnanir og fyrirtæki með það fyrir augum að fara síðan seinna út í fyrirtækjarekstur á þessu sviði,“ segir Aðalheiður.

Fyrst og fremst hugsað fyrir verkefni á frumstigi

Þórgnýr Dýrfjörð, forstöðumaður atvinnu- og menningarmála hjá Akureyrarbæ, segir aðstöðu sem þessa geta breytt miklu fyrir fólk með verkefni á frumstigi. „Þetta eru oft einstaklingar sem eru þá vinnandi heima hjá sér eða ekki í samfélagi og hafa ekki aðgang að reglulegum vinnustað eða vinnutíma. Það getur bara skipt mjög miklu máli að fá þessa festu og hafa þá tækifæri til þess í hálft ár án þess að borga fyrir,“ segir hann.

Þórgnýr vonar að í framtíðinni verði hægt að setja á fót samvinnumiðstöð á Akureyri sem væri vettvangur fyrir frumkvöðla, en líka fólk sem vinnur heima.

RÚV 16. ágúst 2022

July 5, 2019August 29, 2022

Verðlaunuð fyrir hugbúnað sinn

Margrét Vilborg Bjarnadóttir heiðruð í Laondon fyrir hugbúnað

Margrét V. Bjarnadóttir, Elinóra Inga Sigurðardóttir og Kristín B. Gunnarsdóttir

Margrét Vilborg Bjarnadóttir hlaut alþjóðleg verðlaun á þingi Heimssamtaka frumkvöðla og uppfinningakvenna GWIIN, sem fram fór í London 27. – 28. júní. Hún hlaut fyrstu verðlaun í flokknum, overall platinum inventor winner of the year 2019, fyrir hugbúnað. Þetta kemur fram í tilkynningu.

Nýsköpun Margrétar heitir Payanalitics sem er hugbúnaðarlausn sem framkvæmir launagreiningar, skoðar áhrif launaákvarðana og ráðast á launabil kynjanna með aðgerðaráætlun og kostnaðargreiningu.

Auk hennar voru einnig Kristín Brynja Gunnarsdóttir og Þorbjörg Helga Vigfúsdóttir heiðraðar. Þess má geta að í fyrra hlaut Sandra Mjöll Jónsdóttir þessi sömu verðlaun fyrst íslenskra kvenna.